Nova edición da Aula de Creación Literaria do Proxecto Legado, que se impartirá nesta infraestrutura cultural cun formato intensivo, con obradoiros dunha hora e media repartidos en tres días: o 7 e o 9 de maio, ás 19.00 horas, e o 11 de maio ás 10.00 horas.
A actividade, tal e como explicou a autora, está dirixida “a todas aquelas persoas que teñan inquedanzas pola escritura de narrativa (ficción/autoficción). Ao longo destas tres sesións, de carácter práctico e ameno, explicarei algúns dos segredos das técnicas de narrativa actuais, falando, entreo outros elementos clave da narración, do enfoque do relato, da creación de tramas e argumentos, da caracterización dos personaxes ou dos diálogos”.
O público, polo tanto, pode ser tanto mozo como adulto e todo xirará en torno a unha idea: a de ter as ferramentas precisas para descubrir, preservar e divulgar a historia persoal ou familiar. Unha temática que é abordada por Gallego no seu libro “O legado da nena do sal” (La Esfera de los libros 2023 – Edicións Xerais 2024), baseada na biografía dunha persoa real.
Haberá 15 prazas dispoñibles para participar na aula, para o que será preciso inscribirse previamente na Biblioteca, ben de xeito presencial como chamando ao teléfono 986890197 como no correo electrónico bibliotecamarin@telefonica.net.
Esta iniciativa municipal está incluída no catálogo de actividades “Ler Conta Moito”, que promove a Xunta de Galicia para dinamizar a Rede de Bibliotecas de Galicia, da que forma parte a nosa biblioteca municipal.
Datos sobre a autora
Elena Gallego Abad é escritora e xornalista cunha ampla traxectoria profesional, ligada a diversos medios de prensa e radio galegos. Representante territorial do Colexio Profesional de Xornalistas de Galicia en Pontevedra, recibiu o Premio Xosé Aurelio Carracedo de xornalismo en 1998, no apartado de medios audiovisuais.
Deuse a coñecer como narradora coa pentaloxía fantástica “Dragal”, publicada por Xerais: “Dragal I. A herdanza do dragón” (2010, finalista do IV Premio Fundación Caixa Galicia de literatura xuvenil en 2009 e Premio Frei Martín Sarmiento 2012); “Dragal II. A metamorfose do dragón” (2011); “Dragal III. A fraternidade do dragón” (2012); “Dragal IV. A estirpe do dragón” (2015) e “Dragal V. O segredo do dragón” (2019).
Autora da novela policial “Sete Caveiras” (Xerais, 2014), da romántica “O Xogo de Babel” (Xerais, 2017), e da histórica “O legado da nena do sal” (Xerais, 2024), Elena Gallego Abad obtivo o II Premio de relatos curtos O Cabaleiro da Vila de Bouzas coa obra “A promesa” (2017).
Tamén escribíu relatos publicados en diversos volumes colectivos, impartiu os obradoiros de escritura creativa “Imos Contar Mentiras”, “Pontevedra Ficción” e a anterior edición do “Proxecto Legado” (incluído no catálogo do programa Ler Conta Moito das bibliotecas públicas de Galicia 2023 e 2024).
